Birgitta Jónsdóttir, þingmaður Pírata, er á leið á fund með Carles Puigdemont, forseta Katalóníu, og ríkisstjórn hans. Birgitta hefur verið í Katalóníu frá því fyrir helgi ásamt 35 öðrum evrópskum þingmönnum í þeim tilgangi að fylgjast með framkvæmd þjóðaratkvæðagreiðslu Katalóna um sjálfstæði sem fram fór í gær.
90% af þeim 2,26 milljónum Katalóna sem kusu um sjálfstæði sjálfstjórnarhéraðsins sögðu já. Miklar óeirðir brutust út á meðan kjörfundi stóð og alls leituðu 844 sér læknisaðstoðar en af þeim voru rúmlega 90 með áverka.
Birgitta segir það vera magnaða upplifun að fylgjast með atburðum í héraðinu síðustu daga. Hún lýsti aðstæðum og við hverju megi búast næstu daga í beinni útsendingu á Facebook nú fyrir stundu.
„Við erum núna að fara að hitta ríkisstjórnina, það eru miklar áhyggjur af því að ef að katalónska ríkisstjórnin lýsi yfir sjálfstæði að þá verði allir handteknir. Ég hef beðið um að fá allar upplýsingar um aðför að kjörnum fulltrúum, eða tilraunum til að þagga niður í þeim eða að hefta þeirra störf, svo að ég geti farið með þau í mannréttindanefnd alþjóðaþingmannasambandsins, en ég er að fara á fund þar síðar í þessum mánuði, það verður mitt lokaverk sem þingmaður.“
Birgitta segist ekki vera vör um þá miklu spennu sem fjölmiðlar hafa verið að lýsa að ríki á svæðinu. Hún finni heldur fyrir sorg og sjokki meðal almennings. „Fólk var mjög staðfast í að láta ekki troða á kröfu sinni um að láta vilja sinn í ljós.“