Kim Yo-jong, yngsta dóttir Kim Jong-il fyrrverandi leiðtoga Norður Kóreu, hefur tekið við af frænku sinni sem meðlimur æðstu valdastofnunar Norður Kóreu. Kim Jong-un tilkynnti stöðuhækkunina á fundi í gær, að því er BBC greinir frá.
Kim Yo-jong, sem er 30 ára gömul, hefur oft komið fram opinberlega með bróður sínum og er talin bera ábyrgð á opinberri ímynd leiðtogans. Fyrir stöðuhækkunina var hún þegar orðin áhrifamikil í áróðursstjórnun landsins og er á svörtum lista í Bandaríkjunum vegna tengsla sinna við mannréttindabrotin sem framin eru í Norður Kóreu.
Kim fjölskyldan hefur verið við stjórnvölinn í Norður Kóreu síðan undir lok síðari heimsstyrjaldarinnar árið 1948 og sérfræðingur BBC, Danny Savage, segir stöðuhækkun Kim Yo-jung enn eitt dæmið um heljargreipina sem fjölskyldan hefur á landinu.
Meðal annarra tilkynninga sem fram komu á fundinum í gær var stöðuhækkun utanríkisráðherra Norður Kóreu, Ri Yong-ho, en hann hefur nú fullgildan atkvæðisrétt í æðstu valdastofnun landsins. Í síðasta mánuði kallaði Ri Yong-ho Donald Trump Bandaríkjaforseta „forsetann illa“ (e. President Evil) á fundi Sameinuðu þjóðanna. Auk þess gaf hann nýlega út yfirlýsingu þess efnis að ef forsetinn haldi áfram hættulegri orðræðu sinni verði Bandaríkin óhjákvæmilega skotmark eldflaugaskota Norður Kóreumanna.