Michel Barnier, aðalsamningamaður Evrópusambandsins í Brexit-viðræðunum, segir enn skorta á þann árangur sem þarf að nást áður en hægt er að hefja næsta stig viðræðna, líkt og Bretar hafa lýst vilja til.

Hann sagði að nokkur hreyfing væri komin á málið en aðilar hefðu enn ekki náð saman um svokallað „skilnaðarsamkomulag“. Sagðist hann vonast til að sjá árangur hvað þetta varðar innan tveggja mánaða.

Samkomulagið varðar fjárhagslegar skuldbindingar Breta gagnvart Evrópusambandinu.

Í þessari viku fer fram fimmta lota viðræðna Evrópusambandsins og Breta en Barnier sagðist ekki geta lagt það til við leiðtogaráð ESB í næstu viku að hefja viðræður um tilhögun sambands ESB og Bretlands til framtíðar.

Brexit-ráðherra Breta, David Davis, hefur hvatt leiðtogana til að veita Barnier umboð til að hefja viðræður um viðskiptasamband ESB og Bretlands en þeir koma saman til fundar 19. og 20. október nk.

Barnier sagðist hins vegar miða að þáttaskilum í desember og sagði yfirlýsingu Theresu May, forsætisráðherra Bretlands, þess efnis að Bretar hygðust heiðra skuldbindingar sínar gagnvart ESB mikilvæga.

Bretar hefðu hins vegar ekki viljað nefna neinar upphæðir og því hefðu mál ekki þokast áfram. Sagði hann það áhyggjuefni.

Að sögn Barnier er skilnaðarsamkomulagið eitt þriggja atriða þar sem ESB mun ekki gefa eftir. Hin varða rétt ríkisborgara Evrópusambandsríkjanna og landamærin að Norður-Írlandi.

Donald Tusk, forseti leiðtogaráðs ESB, varaði við því fyrr í vikunni að aðilar þyrftu að huga að því í hvað stefndi.

Ítarlega frétt um málið má finna hjá BBC.

Tengdar fréttir

Brexit

Verði auðveldara að fara til og frá Bretlandi

• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins
• Meiri afli vegna Brexit kalli á fjárfestingar

» Fleiri tengdar fréttir

• Blogga um frétt