Erlent | AFP | 12.10.2017 | 13:03

Ekki sjálfsvíg heldur morð

Bróðir Ahmed, Mohamed Timol, í réttarsalnum í morgun. AFP

Ahmed Timol var 29 ára baráttumaður gegn aðskilnaðarstefnunni í Suður-Afríku þegar hann var handtekinn í Jóhannesarborg í október 1971. Fimm dögum síðar hrapaði hann til bana í höfuðstöðvum lögreglunnar. Málið var afgreitt sem sjálfsvíg en í dag, 46 árum síðar, féll dómur í málinu. Timol var myrtur af lögreglunni. Dómurinn sem kveðinn var upp í Pretoria í dag er tímamótadómur í Suður-Afríku og getur haft fordæmisgildi varðandi fleiri mál tengd aðskilnaðarstefnunni í S-Afríku.

Yfirmenn lögreglunnar gáfu vitnisburð á sínum tíma að um sjálfsvíg hafi verið að ræða og var það staðfest með dómi ári síðar. En fjölskylda Timol barðist fyrir réttlætinu áratugum saman og loksins í júní á þessu ári var málið tekið upp aftur.

Stökk ekki heldur var honum hrint

„Timol stökk ekki út um gluggann heldur var honum ýtt út um gluggann eða fram af þakinu,“ sagði dómarinn, Billy Mothle, þegar hann las niðurstöðu dómsins. Sjálfur dómurinn er 129 blaðsíður að lengd. „Liðsmenn öryggissveita lögreglunnar myrtu Timol.“

Dómarinn hefur farið fram á að einn af yfirmönnum öryggissveitanna, Joao Rodrigues, sem viðurkenndi að hafa veitt aðstoð við að hylma yfir morðið, verði saksóttur. Þeir sem frömdu sjálfan verknaðinn eru aftur á móti látnir.

„Flestir af aðal illvirkjunum eru látnir en allir liðsmenn öryggissveitanna sem báru ábyrgð á vörslu og yfirheyrðu Timol eru samábyrgir fyrir áverkum hans,“ segir Mothle.

Imtiaz Cajee, ættingi Ahmed Timol, með mynd af Timol. AFP

Félagar í Kommúnistaflokki Suður-Afríku, en Timol var félagi í flokknum, voru viðstaddir dómsniðurstöðuna í dag. Þeir kölluðu „Viva Ahmed Timolm“ þegar dómarinn hafði kveðið upp dóm í málinu.

Salim Essop, sem var handtekinn um leið og Timol árið 1971 en lifði af þrátt fyrir pyntingarnar sem þeir voru beittir, fagnaði niðurstöðunni í morgun.

Dómarinn hvatti jafnframt fjölskyldur þeirra sem létust við svipaðar aðstæður og Timol til þess að óska eftir endurupptöku málanna. Einkum og sér í lagi ef andlát þeirra var skráð sem sjálfsvíg.