Kafarar dönsku lögreglunnar hafa fundið sög á svipum slóðum og kafbátur Peter Madsen, UC3 Nautilus, sigldi í Køge-flóa 11. ágúst. Sænska blaðakonan Kim Wall var um borð en hún sást síðast á lífi þennan dag.
Þetta kemur fram í fréttatilkynningu frá lögreglunni í Kaupmannahöfn í morgun. Sögin fannst í gær og rannsakar tæknideild lögreglunnar hvort sögin tengist morðinu á Wall, segir aðstoðarlögreglustjóri borgarinnar, Jens Møller Jensen, í tilkynningunni.
Madsen er talinn hafa myrt Wall, bútað lík hennar sundir og hent í sjóinn. Búkur hennar fannst í sjónum 21. ágúst en í síðustu viku fannst höfuð hennar og fótleggir ásamt fatnaði sem hún var í. Enn er handleggjanna leitað og þess vegna eru kafarar enn að störfum í Køge-flóa. Engin merki um höfuðhögg fundust á líkinu en líkamshlutunum og fatnaðinum sem fundust í síðustu viku hafi verið sökkt í pokum sem voru þyngdir með járnstykkjum.