Skotárás í Svíþjóð

Í það minnsta fjórir manns eru særðir eftir skotárás í verslun í miðbæ Trelleborg í Svíþjóð. Lögregla fékk tilkynningu um skotárásina um hálf ellefu leytið að staðartíma. Leit stendur yfir að árásarmönnunum. Aftonbladet greinir frá.

Hinir særðu hafa verið fluttir á sjúkrahús en meiðsl þeirra eru ókunn að svo stöddu. Lögregla er með mikinn viðbúnað á svæðinu og leitar eins eða fleiri árásarmanna. Svæðinu hefur verið lokað á meðan lögregluaðgerðir standa yfir. 

Samkvæmt upplýsingum lögreglunnar í Svíþjóð fékk lögreglan nokkur símtöl um mögulega skotárás í miðborg Trelleborg. Voru nokkrir sárir eftir skotsár og voru þeir fluttir á sjúkrahús. Hófst strax stór lögregluaðgerð á vettvangi. Allir hinir særðu eru karlmenn.

Samkvæmt Dagens nyheter rannsakar lögreglan árásina sem tilraun til manndráps.

Lögreglan hefur fært til yfirheyrslu nokkra einstaklinga vegna málsins sem lögreglan segir vera gróft ofbeldisbrot.

• Blogga um frétt