Carles Puigdemont, leiðtogi Katalóníu, biðlar til forsætisráðherra Spánar að falla frá ákærum gegn lögreglustjóra svæðislögreglunnar í Katalóníu, Josep Lluis Trapero, og tveimur forystumönnum sjálfstæðissinna. Þeir eru sakaðir um að dreifa uppreisnaráróðri gegn spænska ríkinu.
Þetta er meðal þess sem kemur fram í bréfi sem Puigdemont skrifar til Mariano Rajoy, forsætisráðherra Spánar, í dag. Bréfið hefur einnig verið sent til fjölmiðla, þar á meðal til mbl.is.
Þar tekur Puigdemont einnig fram að sú staða sem nú sé komin upp í spænskum stjórnmálum geri það að verkum að einungis sé hægt að leysa málin með „pólitískum lausnum af hæstu gerð.“ Það hafi því komið honum á óvart þegar Rajoy ákvað að undirbúa formlega að hann kynni að nýta heimild í spænsku stjórnarskránni til að afturkalla sjálfstjórnarréttindi héraðsins.
Ríkisstjórn Spánar hefur veitt Puigdemont framlengdan frest, til klukkan 10, á fimmtudagsmorgun til þess að gefa það berlega til kynna hvort héraðið muni lýsa yfir sjálfstæði.
Puigdemont segist hins vegar í bréfi sínu að hann vilji stofna til formlegra viðræðna næstu tvo mánuði, þar sem vandlega verði farið yfir niðurstöðu þjóðaratkvæðagreiðslunnar og næstu skref verði tekin af skynsemi. Puigdemont leggur einnig til að spænsk og katalónsk fyrirtæki og stofnanir taki þátt í viðræðunum.
„Tillaga okkar um viðræður er sett fram af einlægni, þrátt fyrir allt sem á undan hefur gengið,“ segir Puigdemont og vísar þar til lögregluofbeldis og mótmæla sem hafa geisað frá því að þjóðaratkvæðagreiðslan um sjálfstæði Katalóníu fór fram 1. okóber.
Yfirvöld á Spáni hafa sakað Puigdemont um að vera óskýran í máli sínum og að honum hafi mistekist að útskýra hvort Katalónía muni lýsa yfir sjálfstæði eða ekki.
Frétt BBC.