Erlent | mbl | 18.10.2017 | 10:26

Of dónaleg fyrir Louvre

Skúlptúrinn er 12 metra hár og nefnist Domestikator. Joep van Lieshout/Pinerest

Pompidou-safnið í París ætlar að sýna höggmynd sem þótti of dónaleg fyrir Louvre-safnið. Um er að ræða verk eftir hollenska listamanninn Joep van Lieshout en það átti í upphafi að prýða Tuileries-garðinn, sem er á milli Louvre og Concorde.

Skúlptúrinn er 12 metra hár og nefnist Domestikator. Sýna átti verkið í tengslum við myndlistarmessuna FIAC (Foire internationale d'art contemporain) sem hefst á morgun en FIAC er ein stærsta og fjölsóttasta myndlistarmessa Evrópu.

En skúlturinn, sem sýnir kynmök tveggja vera, þótti sýna aðeins of mikið fyrir Louvre safnið, segir í frétt Guardian.

„Ég varð fyrst mjög undrandi en síðan eðlilega vonsvikinn yfir því að Louvre gæti ekki sýnt verkið,“ segir Lieshout í samtali við Reuters, og tekur fram að hann hafi alls ekki ætlað sér að særa blygðunarkennd fólks.

Franskir fjölmiðlar greina frá því að stjórnendur Louvre hafi tekið þessa ákvörðun eftir að hafa fengið yfir sig sæg kvartana á samfélagsmiðlum.

Búið er að setja verkið, sem er úr stáli, við og trefjagleri, upp fyrir framan Pompidou.

„Ruddalegt, klámfengið? Ja ruddinn er alls staðar og klámið, því miður líka. En svo sannarlega ekki í þessu verki,“ segir Bernard Blistene, safnstjóri Pompidou Centre.

Hann segir verkið skemmtilegt því það er á ruddafenginn hátt vísbending um samband abstrakt og fígúratíra málverka í hollenskri list á síðustu öld.

Verið hefur þegar verið til sýnis í Bochum í Þýskalandi og ekki vakið neina umræðu þar.

Van Lieshout segir að með verkinu hafi hann viljað sýna hvernig maðurinn drottnar og temur skepnur, bæði í landbúnaði og iðnaði. Hann skilur eiginlega ekki hvernig hægt hafi verið að sjá eitthvað klámfengið út úr verkinu en þetta er hins vegar ekki í fyrsta skipti sem verk á FIAC þykir of klámfengið fyrir Parísarbúa.

Listaverkið Tree eftir Paul McCarthy á Vendôme-torgi í París árið 2014. afp

Til að mynda uppblásna verkið sem var eyðilagt árið 2014 en það þótti minna of á kynlífsleikfang. Þá sagði borgarstjóri Parísar, Anne Hidalgo, að skemmdarverkið væri árás á frelsi listamannsins.