Margot Wallström, utanríkisráðherra Svíþjóðar, segist hafa orðið fyrir kynferðislegri áreitni „á hæsta stigi stjórnmálanna“.
Þessu greindi hún frá á Facebook er hún gekk til liðs við herferðina #MeeToo.
„Ég get staðfest að þetta gerist á hæsta stigi stjórnmálanna og að ég hef sjálf lent í þessu,“ sagði Wallström við TT-fréttastofuna í Svíþjóð.
Hún kvaðst ekki vilja tala um atvikið „á of persónulegan máta“ og vildi heldur ekki staðfesta að það hafi gerst á fundi með embættismönnum Evrópusambandsins.
„Við þurfum að hugsa um lögin okkar. Hvernig við getum breytt viðhorfi fólks og hvernig við getum notað kunnáttu okkar til að binda enda á kynferðislega áreitni,“ sagði hún.
Wallström hefur verið utanríkisráðherra frá árinu 2014.