Jacinda Ardern, formaður Jafnaðarmannaflokksins í Nýja-Sjálandi, verður forsætisráðherra landsins. Hún verður jafnframt yngsti einstaklingurinn til að gegna embættinu frá árinu 1856. Hún er 37 ára gömul. BBC greinir frá.
Ríkisstjórnina skipa Jafnaðarmannaflokkurinn og Miðjuflokkurinn Nýja-Sjáland fyrst. Jafnaðarmenn eru næststærstir á þingi með 45 sæti eftir þingkosningarnar í september og fengu 13 fleiri þingmenn en þegar kosið var fyrir þremur árum. Miðjuflokkurinn fékk nær 11% atkvæða og 9 menn kjörna. Flokkur Græningja mun einnig styðja ríkisstjórnina.
Stjórnmálaskýrendur segja að helsta áskorun hennar verði að sannfæra Nýsjálendinga sem ekki kusu hana að hún sé fullfær um að stýra landinu þrátt fyrir að flokkur hennar hafi verið sá stærsti í kosningunum.
Ardern var skipaður formaður flokksins í ágúst og hefur því gegnt formennsku í tæpa þrjá mánuði. Fyrrverandi formaður flokksins Andrew Little sagði af sér í kjölfar slæms gengis Jafnaðarmanna í skoðakönnunum.
Formannsskiptin hafa heldur betur skilað tilætluðum árangri. Nýsjálenskir miðlar ganga svo langt að kalla áhrifin af persónufylgi hennar Jackindamania eða Jackindu-brjálæðið.
Í kosningabaráttunni var hún ítrekað spurð út í barneignir og meðal annars hvort barn myndi hafa áhrif á möguleika hennar á að gegna starfi forsætisráðherra og fleiri spurningar í þeim dúr. Hún svaraði spurningunum á þann hátt að það væri: „Algjörlega óásættanlegt að árið 2017 þurfi konur að svara spurningum sem þessum á starfsvettvangi sínum.“
Ardern hefur lýst sjálfri sér sem hefðbundnum jafnaðarmanni og femínista, auk þess sem hún vill setja á stofn lýðveldi með forseta í stað Bretadrottningar. Þá hefur hún talað fyrir frjálslyndari löggjöf um fóstureyðingar.