15 liðsforingjaefni í afganska hernum létust í dag í sjálfsvígsárás í Kabúl, höfuðborg Afganistan. Segja afgönsk yfirvöld tölu látinna af völdum árása hinna ýmsu uppreisnahópa í þessari viku nú vera í kringum 200 manns.
Dawlat Waziri, talsmaður varnarmálaráðuneytisins, sagði fjóra til viðbótar hafa særst í árásinni sem átti sér stað hlið Marshal Fahim herskólans.
Sjálfsvígsmaðurinn var gangandi en liðsforingjaefnin voru að yfirgefa skólasvæðið í smárútu.
Þetta var önnur sjálfsvígsárásin í borginni á innan við sólarhring, en 56 manns létust í gær í sjálfsvígsárás við mosku síja múslima og lýstu hryðjuverkasamtökin Ríki íslams árásinni á hendur sér.