Farið var með konurnar tvær sem eru ákærðar fyrir að hafa myrt hálfbróður Kims Jong-un, leiðtoga Norður-Kóreu, á flugstöðina í Malasíu þar sem eitrað var fyrir hann.
Þeirra var vandlega gætt af lögreglumönnum. Konurnar voru leiddar um flugstöðina en einnig var ekið með þær í hjólastólum og önnur þeirra brast í grát.
Þær Siti Aishyah frá Indónesíu og hin víetnamska Doan Thi Huong voru handjárnaðar og í skotheldum vestum þegar farið var með þær á alþjóðaflugvöllinn í Kuala Lumpur. Um var að ræða hluta af réttarhöldum yfir þeim og með í för var dómari, auk verjenda og saksóknara.
Um tvö hundruð lögreglumenn, margir vopnaðir rifflum og með grímur fyrir andlitinu, stóðu vörð.
Kim Jong-nam var að bíða eftir eftir að fara um borð í flugvél í febrúar þegar eitrað var fyrir hann með taugagasi og vakti morðið mikla athygli um víða veröld.
Heimsóknin á flugstöðina átti að veita þeim sem tengjast réttarhöldunum betri innsýn í það sem gerðist þennan dag.
Mikill fjöldi blaðamanna elti konurnar um allan flugvöllinn en vopnaðir lögreglumenn komu í veg fyrir að þeir kæmust of nærri.
Meðal annars var komið við í brottfararsalnum þar sem ráðist var á Kim, á læknastofunni þangað sem farið var með hann eftir árásina og á salerni þar sem talið er að konurnar sem eru grunaðar um verknaðinn hafi farið eftir árásina.