George Bush eldri, fyrrverandi Bandaríkjaforseti, hefur beðið leikkonuna Heather Lind afsökunar á að hafa valdið henni þjáningu. Lind ásakaði Bush, sem er 93 ára gamall, um að hafa áreitt sig kynferðislega fyrir þremur árum.
Á samfélagsmiðlinum Instagram sagði Lind að forsetinn fyrrverandi hefði „snert hana að aftan úr hjólastól“ og sagt „klámfenginn brandara“ á meðan þau sátu fyrir á ljósmynd. BBC greinir frá þessu.
Hún hefur núna eytt færslunni. Í frétt BBC kemur fram að talsmaður Bush hafi sagt að um hafi verið að ræða tilraun til að gera gys. „Forsetinn myndi aldrei - undir nokkrum kringumstæðum - viljandi valda nokkurri manneskju þjáningu. Hann biðst einlæglega afsökunar ef tilraunin til að gera að gamni sínu hefur gengið fram af frú Lind,“ segir í yfirlýsingu sem send var á fjölmiðla sem fjölluðu um málið, svo sem Daily Mail og tímaritið People.
Bush var forseti Bandaríkjanna á árunum 1989 til 1993 og er faðir George W. Bush, sem gegndi sama embætti á árunum 2001 til 2009. Hann glímir við Parkinsons-sjúkdóminn.
Atvikið mun hafa átt sér stað á viðburði fyrir sjónvarpsþættina Turn: Washingston's Spies. Í þeim þáttum fer Lind með eitt af aðalhlutverkum.
Í færslu sinni á Instagram mun Lind hafa sagt að hún gæti annað en sagt frá, eftir að hafa séð mynd af Barack Obama, fyrrverandi Bandaríkjaforseta, taka í hönd Bush. Sú mynd var tekin á viðburði þar sem peningum var safnað fyrir fórnarlömb fellibyls.
„Hann áreitti mig kynferðislega þegar ég sat fyrir á sambærilegri mynd,“ sagði hún á Instagram. „Hann tók ekki í höndina á mér. Hann snerti mig aftan frá, í hjólastólnum sínum, á meðan eiginkona hans, Barbara Bush, stóð honum við hlið.“
Hún bar að hann hefði því næst sagt klámfenginn brandara og að myndatöku lokinni hefði hann snert hana aftur.