Stjórnarher Sýrlands og herir bandamanna hafa náð völdum að fullu í borginni Deir Ezzor í austurhluta landsins. Þar hafði Ríki íslams ráðið ríkjum um skeið.
Valdatakan var tilkynnt í sýrlenska ríkissjónvarpinu í dag. „Herinn tilkynnir um full völd í Deir Ezzor-borg,“ sagði í fréttum sjónvarpsstöðvarinnar í dag. Var fréttin höfð eftir heimildarmönnum á vettvangi. „Borgin er að fullu frelsuð undan hryðjuverkastarfsemi,“ sagði í fréttinni.
Ríki íslams hefur verið með borgina á sínu valdi frá því árið 2014. Hún var mikilvægt hernaðarlegea vegna þess að hún er skammt frá landamærunum að Írak.
Átök hafa staðið í borginni vikum saman. Ríki íslams hefur undanfarna mánuði tapað völdum yfir mörgum borgum og bæjum í Írak og Sýrlandi.