Fíll traðkaði tvo ferðamenn til bana

Fíll traðkaði tvo ferðamenn til bana í Sambíu síðastliðinn laugardag, þar sem þeir voru í dýralífsskoðun. SkyNews greinir frá.

Um var að ræða 57 ára konu frá Belgíu og 64 ára karlmann frá Hollandi. Konan fór of nálægt fílnum þegar hún var að reyna að ná myndum og varð undir fótunum á dýrinu. Karlmaðurinn hlaut sömu örlög þegar hann reyndi að koma henni til bjargar.

Fólkið dvaldi á hótelinu Marama River Lodge í bænum Livingstone í Sambíu og freistaði þess að skoða fílana og taka af þeim myndir þegar þeir komu nálægt hótelinu. Bæði hlutu þau mikla áverka við árásina og létust af sárum sínum.

Í afrískum miðlum er greint frá því að fílahjarðir hafi streymt að Livingstone upp á síðkastið, en ekki er langt síðan fíll traðkaði öryggisvörð til bana þar sem hann var á leið til vinnu sinnar.

• Blogga um frétt