Halda unglingapartí í Airbnb-íbúðum

Nokkur mál hafa komið upp í Noregi þar sem unglingar hafa leigt íbúðir á Airbnb til þess eins að halda þar partí, að sögn norsku lögreglunnar.

Í Kristiansand leigði Eirik Styrvold Nordahl út íbúð sína eins og oft áður á Airbnb og var um hefðbundinn leigusamning að ræða þar sem sex ætluðu að gista. Í ljós kom að íbúðin var nýtt fyrir unglingapartí þar sem gestirnir voru 80 talsins.

Nordahl frétti af misnotkuninni eftir að nágrannarnir höfðu samband við hann og kvörtuðu, segir á vefnum Fædrelandsvennen. Hann segist hafa fengið áfall og neitað að trúa þessu. Allt hafi verið með eðlilegum hætti og leigan greidd fyrirfram. Leigjandinn er 18 ára gamall.

Alls mættu um 80 unglingar í partíið og að sögn Nordahls var honum tjáð eftir á að þeir hefðu verið á aldrinum 13-18 ára. Talsverðar skemmdir voru unnar á íbúðinni, sófi eyðilagður og gólfið illa farið. Í auglýsingu Nordahl á Airbnb er tekið fram að íbúðin sé reyklaus og bannað að halda þar partí.

Lögreglan staðfestir að nokkur svipuð tilvik hafi komið til þeirra kasta. Það sem veldur lögreglu mestum áhyggjum er ungur aldur gesta og neysla á ólöglegum vímuefnum.

• Blogga um frétt