Talsmaður Theresu May, forsætisráðherra Bretlands, segir að það hafi verið rangt af Donald Trump Bandaríkjaforseta að deila færslu breska öfgahópsins Britain First á Twitter.
„Britain First reynir að tvístra samfélögum með því að nota hatursfulla orðræðu með lygum og með því að ala á aukinni spennu. Þau valda kvíða hjá löghlýðnu fólki,” sagði talsmaðurinn.
Hann bætti við að mikill meirihluti almennings í Bretlandi hafni fordómum hægri öfgahópa.