Ísraelski herinn greindi frá því í dag að fjölgað verði í hersveitum á Vesturbakkanum í kjölfar þess að Donald Trump Bandaríkjaforseti lýsti því yfir í gær að Bandaríkin viðurkenni nú Jerúsalem sem höfuðborg Ísrael.
„Þetta var niðurstaðan eftir mat á aðstæðum. Það var ákveðið að fjölga herfylkjum á svæðinu Vesturbakkanum , sem og að fjölga í njósnsveitum sem og í heimavarnarsveitum,“ sagði í yfirlýsingu frá hernum.
Þessu til viðbótar verði fjölgað þeim hersveitum sem hafðar verða í viðbragðsstöðu.
Þjóðir heims hafa keppst um að fordæma ákvörðun Trump, en forsætisráðherra Ísraels, Benjamin Netanyahu, hefur hins vegar lýst yfir ánægju með ákvörðunina og segir nafn Trumps komið á spjöld sögu borgarinnar.
„Trump forseti hefur bundist sögu höfuðborgar okkar órjúfanlegum böndum,“ sagði Netanyahu í morgun.
Pólitískur leiðtogi Hamas á Gaza, Ismail Haniya, hefur þá hvatt Palestínumenn til uppreisnar (intifada) vegna ákvörðunar forseta Bandaríkjanna. „Við getum ekki mætt þessari stefnu zíonista, sem nýtur stuðnings Bandaríkjanna, á annan hátt en með nýrri uppreisn,“ sagði Haniya í ræðu í morgun. Hamas er við stjórn á Gaza-ströndinni,