Skógareldar sem geisað hafa í suðurhluta Kaliforníu síðustu daga hafa nú náð útbreiðslu til íbúabyggðar í Los Angeles. Skógareldar hafa ítrekað blossað upp á árinu í ríkinu og eru þeir mannskæðustu í sögu Kaliforníu.

Um 40 manns hafa látið lífið í skógareldum í ríkinu það sem af er ári. Þúsundir heimila og fyrirtækja hafa orðið fyrir eyðileggingu.

Vista del Mar spítalinn í Ventura er á meðal bygginga sem hafa brunnið til grunna í skógareldunum suðurhluta Kaliforníu. AFP

New York Times fjallar um orsakir eldana og þar kemur meðal annars fram að óvenjumikil úrkoma hafi verið í ríkinu síðasta vetur, sem leiddi til aukinnar gróðursprettu yfir sumartímann. Afar heitt var í veðri í sumar og miklir þurrkar. Gróðurinn í ríkinu er því afar eldfimur.

Íbúabyggð hefur verið að færast nær skóglendi í ríkinu síðustu ár og hafa eldarnir því áhrif á þúsundir íbúa í borginni, en 5% heimila í Santa Rosa hafa til að mynda brunnið til grunna.  

Fjöldi umferðarslysa hefur orðið þegar íbúar flýja skógareldana. Einn lést þegar hann var að yf­ir­gefa svæði þar sem skógar­eld­arn­ir geisuðu þegar bíll­inn hans valt. AFP

Eldarnir hafa mikil áhrif á daglegt líf í borginni og hefur skólastarf fallið niður, vegum verið lokað og þúsundir manna hafa þurft að yfirgefa ákveðin svæði í borginni. Fólk reynir þó að láta lífið hafa sinn vana gang, meðal annars með því að mæta til vinnu, en útsýni á leið til vinnu er ansi breytt, líkt og sjá má á þessu myndbandi: 

Not the typical morning commute... pic.twitter.com/kJIOQeqsIK

— A. Mutzabaugh CMT (@WLV_investor) December 6, 2017

Mjög hvasst er í borginni sem gerir slökkviliðsmönnum erfitt fyrir, en vindhviður hafa farið upp í 35 metra á sekúndu. „Vindurinn gerir það að verkum að ekki er hægt að berjast við eldinn,“ segir Ken Pimlott, slökkviliðsstjóri í ríkinu. Hann segir slökkvistarfið þessa stundina snúast aðallega um að koma fólki í burtu frá eldunum.

Um 450 ferkílómetra svæði hefur orðið eldinum að bráð síðustu daga. Yf­ir­völd hafa gefið út fjólu­bláa viðvör­un en slík viðvör­un hef­ur aldrei áður verið gef­in þar út.

Slökkviliðsmenn sem reyna að ná tökum á eldinum þessa stundina skipta þúsundum. Tæplega 200.000 manns hafa þurft að yfirgefa heimili sín í Los Angeles og Ventura og hafa 300 heimili og fyrirtæki eyðilagst í eldunum. 

Þykkur reykjarmökkur umlykur Mondos ströndina sem liggur meðfram þjóðvegi 101. AFP

Illa hefur gengið að ná tökum á eldunum vegna hvassviðris. AFP

Tengdar fréttir

Skógareldar í Kaliforníu 2017

Þriðju stærstu eldar frá upphafi

• Slökkviliðsmaður lést í baráttu við gróðureldana
• Illa gengur að ná tökum á eldinum
• Stærra en New York
• Varð að yfirgefa heimili sitt

» Fleiri tengdar fréttir

• Blogga um frétt