Konungleg veisla fyrir Nóbelsverðlaunahafa

Í kvöld fer fram hátíðarkvöldverður í Stokkhólmi til heiðurs þeim sem hlutu Nóbelsverðlaunin í ár. Mikið er lagt í veisluna sem konungsfjölskyldan mætir til, prúðbúin eins og aðrir gestir.

Blómaskreytingafólk, ljósahönnuðir og fjöldinn allur af kokkum hefur staðið í ströngu við undirbúning veislunnar sem fram fer í Bláu höllinni. Matseðilinn er ekki af verri endanum og í ár var lambakjöt í aðalrétt. Bláber léku svo stórt hlutverk í eftirréttinum.

Bláa höllin er salur í ráðhúsi Stokkhólms sem notaður er þegar halda þarf veislur fyrir mikilmenni, s.s. þjóðhöfðingja og aðra gesti. Það er ekki leyfilegt að mæta í gallabuxum - karlmenn verða að vera í kjólfötum og konur í kvöldkjólum. 

Mikil leynd hvíldi framan af degi yfir matseðlinum sem og öðru sem fyrir augu bar í salnum. Sýnt hefur verið frá veislunni í beinni útsendingu á sænska ríkissjónvarpinu þar sem þulir lýsa öllu því sem sjá má, allt frá klæðnaði gesta til upplýsinga um bakgrunn þeirra og störf.

Hvorki fleiri né færri en 1.350 gestir eru í veislunni. Fimm daga hefur tekið að undirbúa máltíðina. 

Veislan hófst klukkan sex í kvöld að íslenskum tíma. 190 þjónar sinntu veislugestunum, þeirra á meðal Karli Gústaf Svíakonungi og fjölskyldu hans.

Nóbelsverðlaunin í bókmentun, efnafræði, eðlisfræði, lækningum og hagfræði voru afhent í Stokkhólmi í dag. Friðarverðlaun Nóbels voru afhent við sérstaka athöfn í Osló.

Hér getur þú lesið matseðlinn