Yngsta drottning veraldar býr í Himalajafjöllunum. Hún er aðeins 27 ára og varð drottning 21 árs. Hún gekk í háskóla á Englandi, ann listum og helgar góðgerðarmálum starfskrafta sína. Jetsun Pema, drottning Bútans, hefur undanfarið notið sífellt meiri vinsælda á samfélagsmiðlum þar sem hún segir frá lífi sínu í máli og myndum.
Árið 2011 giftist Jetsun konungi Bútans, Jigme Khesar Namgyel Wangchuck. Hann er nú orðinn 37 ára. Saman eiga þau tæplega tveggja ára dreng, prinsinn Jigme Namgyel Wangchuck.
Hjónin hafa stundum verið kölluð „Villi og Kata Himalajafjallanna“ en þau fengu einmitt Vilhjálm Bretaprins og Katrínu hertogaynju í heimsókn á síðasta ári.
Konungsríkið Bútan er lítið landlukt land í austurhluta Himalajafjalla á milli Indlands, Tíbets og Kína. Í vestri skilur indverska héraðið Sikkim landið frá Nepal og í suðri skilja indversku héruðin Assam og Vestur-Bengal það frá Bangladess. Íbúar landsins eru um 800 þúsund.
Bútan skiptist áður milli lítilla furstadæma þar til Shabdrung Ngawang Namgyal, flóttamaður frá Tíbet, sameinaði það undir eina stjórn á 17. öld. Fyrsti konungur Bútans tók við völdum árið 1907.
Bútan gerði samning við Bretland árið 1910 um að það færi með utanríkis- og varnarmál þess. Tveimur árum eftir að Indland fékk sjálfstæði gerði Bútan svipaðan samning við Indland. Landið hefur því sterk efnahagsleg og hernaðarleg tengsl við Indland í dag.
Mikil náttúrufegurð er í Bútan og er landið orðið vinsæll viðkomustaður ferðamanna.
„Ég hef beðið nokkuð lengi með að gifta mig. En það skiptir ekki máli hvenær þú giftist svo lengi sem þú giftist þeirri réttu. Ég er viss um að ég er að giftast þeirri réttu,“ sagði konungur Bútans, stundum nefndur Dreka-kóngurinn, við fjölmiðla er hann gekk í það heilaga.
Áður en að þau giftust hafði Jetsun menntað sig á Indlandi og gekk síðar í Regent's College í London þar sem hún nam alþjóðasamskipti, sálfræði og listasögu. Ást á listum er eitt af því sem sameinar nú hjónakornin.
Kóngurinn er einnig vel menntaður og stundaði um tíma nám við Oxford-háskóla. Hún fékk drottningartitilinn er hún giftist Jigme Khesar haustið 2011.
Ýmsar sögur hafa verið sagðar af því hvernig þau kynntust. Í þeirri sem Washington Post birtir segir að þau hafi fyrst hist í lautarferð er hún var sjö ára og hann sautján. Á Jetsun að hafa gengið upp að hinum unga prinsi og faðmað hann.
Jetsun hefur verið lýst sem almúgastúlku sem hafi orðið yfir sig ástfangin af kónginum. Hins vegar er ljóst að fjölskylda hennar átti í nánum tengslum við konungsfjölskylduna löngu áður en þau kynntust. Hún er dóttir flugmanns og langafi hennar var aðalsmaður í austurhluta Bútans. Þá var móðurafi hennar hálfbróðir síðari eiginkonu fyrrverandi konungs Bútans.
Unga drottningin er í dag þekkt fyrir góðgerðarstörf sín. Hún er m.a. mjög virk í starfi Rauða krossins og fleiri mannúðarsamtökum í landi sínu.
„Hún er dásamleg manneskja og greind,“ sagði kóngurinn eitt sinn í viðtali um hina ungu eiginkonu sína. Í öðru viðtali lýsti hann eiginkonu sinni með þessum orðum: „Margir hafa skoðanir á því hvernig drottning eigi að vera. Að hún eigi að vera einstaklega falleg, gáfuð og tignarleg. Ég held að margir geti passað inn í það hlutverk með tímanum. En það sem skiptir mestu máli er að drottning sé góð manneskja, að hún átti sig á því hlutverki að þjóna almenningi og landinu. Ég hef fundið mína drottningu og hún er þannig manneskja. Þó að hún sé enn ung þá er hún hlý og góðhjörtuð. Þessir eiginleikar og sú reynsla sem hún mun öðlast með tímanum munu gera hana að góðum þjóni þjóðarinnar.“
Brúðkaup þeirra varði í nokkra daga og síðasta dag hátíðarhaldanna fengu íbúar hins litla konungríkis að fagna með þeim á íþróttaleikvangi í höfuðborginni Thimphu, heimabæ hinnar nýkrýndu drottningar.