Öryggisráðið hafni yfirlýsingu Bandaríkjanna

Öryggisráð Sameinuðu þjóðanna íhugar nú tillögu, sem Egyptar lögðu fram, um að sú ákvörðun Bandaríkjanna að lýsa Jerúsalem höfuðborg Ísraels hafi ekkert lagalegt gildi og  að fella verði hana úr gildi.

Tillögunni var dreift meðal þeirra 15 þjóða sem eiga sæti í Öryggisráðinu í dag, en hvorki Donald Trump Bandaríkjaforseti né Bandaríkin eru nefnd þar á nafn. Reuters fréttastofan segir tillöguna njóta stuðnings margra aðildarríkja, en að líklegt megi telja að Bandaríkin beiti neitunarvaldi sínu gegn henni.

Kosið verður um tillöguna snemma í næstu viku og þarf hún að njóta stuðnings níu ríkja og ekki vera synjað af neinu þeirra ríkja sem hafa neitunarvald í Öryggisráðinu til að fást samþykkt. Bandaríkin, Frakkland, Bretland, Rússland og Kína hafa neitunarvald og þykir því ólíklegt að tillagan fáist samþykkt.

Hún þykir engu að síður líkleg til að auka enn á einangrun Trumps varðandi málefni Jerúsalem.

• Blogga um frétt