Rex Tillerson, utanríkisráðherra Bandaríkjanna, segist aldrei hafa efast um andlega heilsu Donalds Trumps, Bandaríkjaforseta.
Tillerson ræddi nýútkomna bók um forsetann, Fire and Fury: Inside the Trump White House, í viðtali hjá CNN.
Í bókinni hefur Michael Wolff, höfundur hinnar umtöluðu bókar um Trump, eftir mörgum nánum samstarfsmenn forsetans kalli hann „fávita“ og „fífl“ og segja hann „haga sér eins og barn“.
Frétt mbl.is: Flestir kalla hann „fífl“ og „fávita“
Trump hefur sagt að bók Wolffs sé full af lygum.
Tillerson, sem á að hafa kallað forsetann hálfvita í fyrra, sagði að Trump væri ekki eins hefðbundninn og forsetar fortíðarinnar.
„Það er vel viðurkennt. Það er líka ástæðan fyrir því að bandaríska þjóðin kaus hann,“ sagði Tillerson í viðtalinu.
Hvað sem útgáfu bókarinnar líður, en hún kom út í gær, mun Trump eyða deginum með hátt settum aðilum í Repúblikanaflokknum þar sem rætt verður um þau stefnumál sem verða sett í forgrunn á árinu.