Þjóðaröryggisráðgjafinn á útleið?
Setja bókamerki
Donald Trump Bandaríkjaforseti hefur ákveðið að reka hershöfðingjann H.R. McMaster úr embætti þjóðaröryggisráðgjafa og er að skoða mögulega arftaka hans samkvæmt frétt bandaríska dagblaðsins Washington Post. Blaðið vísar í fimm ónafngreinda heimildarmenn.
Fram kemur í fréttinni að Trump hafi aldrei náð vel saman við McMaster. Forsetinn ætli hins vegar að taka sér tíma í að framkvæma ákvörðunina þar sem hann vilji bæði forðast það að niðurlægja hershöfðingjann og finna góðan eftirmann samkvæmt heimildarmönnunum.
McMaster sagði í síðasta mánuði að óumdeilanlegt væri að Rússar hefðu reynt að hafa áhrif á forsetakosningarnar í Bandaríkjunum 2016 og í nóvember var fullyrt að þjóðaröryggisráðgjafinn hefði kallað Trump „fábjána“ og „fífl“ í einkasamkvæmi í júlí.
Hershöfðinginn var ennfremur sagður hafa gagnrýnt ýmsa háttsetta ráðgjafa Trumps, sagt að forsetinn hefði gáfnafar á við „leikskólakrakka“ og að hann skorti skynsemi til þess að skilja þau mál sem lægju fyrir þjóðaröryggisráði Bandaríkjanna.
Fyrr í vikunni rak Trump Rex Tillerson úr embætti utanríkisráðherra en samkvæmt Washington Post má búast við frekari uppstokkunum háttsettra embættismanna. Titringur er sagður á meðal embættismanna í Hvíta húsinu vegna frekari ákvarðana forsetans.
Bjarkey stendur við skammarbréf Svandísar
Aðeins ein leið fær í Grindavíkurmálum
Ný staða uppi og óvissan meiri
Ekki byggt í takt við áform sveitarfélaga
Ísraelar hefna árásarinnar
Innviðir þandir og álagið „gríðarlegt“
Færa slökkviliðið til nútímans
Hyggjast leyfa fólki að skoða gosið