Hvetur fleiri til að bera naloxone

Landlæknir Bandaríkjanna, Jerome Adams, hvetur fleiri Bandaríkjamenn til að hafa naloxone nefúða í fórum sínum. Naloxone er neyðar­lyf sem notað er til að koma í veg fyr­ir að fólk deyi úr ofskömmt­un af morfíni og öðrum ópíóíðalyfj­um og hefur verið töluvert í umræðunni hér undanfarið vegna fjölgunar dauðsfalla af völdum ópíóða.

Segir Adams fleiri þurfa að geta borið kennsl á hættuna á ofskömmtun og bera naloxone til að koma í veg fyrir ofskömmtun.

„Á hverjum degi þá deyja 115 Bandaríkjamenn af of stórum skammti ópíóða. Það er einn á hverri 12 og hálfri mínútu,“ hefur BBC eftir Adams.

Talið er að fleiri látist nú af völdum ópíóða en létust af völdum eyðni er HIV krísan var í hámarki.

Bandaríski landlæknirinn Jerome Adams vill að fleiri beri naloxone nefúða. AFP

42.000 dóu úr of stórum skammti 2016

Rúmlega 250.000 manns hafa látist af ofskömmtun á sl. áratug og á auðvelt aðgengi að lyfseðilsskyldum ópíóðum þar sinn þátt að máli. Árið 2016 létust 42.000 Bandaríkjamenn af of stórum skammti.

Sagði í ráðleggingum sem bandaríska landslæknisembættið birti í dag að þeir Bandaríkjamenn sem eigi á hættu að taka of stóran skammt, eða sem umgangast fólk sem líklegt er til að gera það, geymi naloxone í fórum sínum.  

„Það er orðið tímabært að tryggja að fleiri hafi aðgang að þessu lífsbjargandi lyfi, af því að 77% allra dauðsfalla af völdum of stórs skammts af ópíóðum eiga sér stað utan heilbrigðisstofnanna og meira en helmingur þeirra á sér stað í heimahúsi,“ sagði yfirlýsingu Adams.

„Að kunna að nota naloxone og hafa það í seilingarfjarlægð getur bjargað lífi,“ sagði hann og kvað fjölda dauðsfalla af völdum ópíóða hafa tvöfaldast síðasta áratuginn.

• 1 blogg um fréttina

Bloggað um fréttina

• Þorsteinn Siglaugsson: Að bjarga lífi eða mæta í jarðarför