Erlent | mbl | 25.7.2018 | 10:43

Par í haldi vegna barnslíksins í skóginum

Breska lögreglan að störfum. AFP

Karl og kona eru í haldi lögreglunnar í Bretlandi eftir að lík ungbarns fannst í skóglendi í Heywood í nágrenni Manchester.

Nakið lík nýfæddrar stúlku, sem lögreglumenn kalla Pearl, fannst 4. apríl. Það var maður á göngu með hundinn sinn sem kom auga á það í skóginum.

Lögreglan hefur nú handtekið 48 ára gamlan karlmann og 33 ára gamla konu. Eru þau grunuð um morð, að hafa leynt fæðingu barns og fyrir að koma í veg fyrir greftrun þess lögum samkvæmt.

Réttarmeinafræðingar komust að þeirri niðurstöðu að stúlkan hefði verið með hjartagalla og að tvö rifbein voru ekki til staðar í líkama hennar.

Erfðafræðileg rannsókn leiddi lögregluna á spor parsins sem nú hefur verið handtekið.

Litla stúlkan fannst látin í skóglendinu að kvöldi dags. Hún var nakin, ekki með teppi yfir sér og ekki með bleiu, segir í frétt Sky um málið.

Lögreglumaður sem kom að rannsókn málsins segir í samtali við Sky að málið sé harmleikur frá upphafi til enda og fyrir alla þá sem að málinu komi. „Við ætlum okkur að komast að sannleikanum fyrir þessa litlu stúlku.“