Sýknaður 18 árum eftir árásina

Þýskur dómstóll hefur sýknað meintan nýnasista vegna sprengjuárásar sem var framin fyrir átján árum.

Árásinni var beint að farandfólki frá Austur-Evrópu, þar á meðal sex gyðingum frá Sovétríkjunum fyrrverandi sem voru staddir á lestarstöð.

Ralf Spies var sýknaður af 12 ákæruliðum fyrir morðtilraun og fyrir að standa á bak við sprenginguna, sem varð í borginni Düsseldorf 27. júlí árið 2000.

Ein kona missti fóstur í sprengingunni.

Árásin vakti mikla athygli í Þýskalandi og var fordæmd víða um heim.

Spies var góðkunningi lögreglunnar á þessum tíma sem öfgamaður og rak verslun skammt frá árásarstaðnum þar sem vörur tengdar hernaði voru til sölu.

Spies var yfirheyrður af lögreglunni á sínum tíma en ekki fundust næg sönnunargögn til að ákæra hann. Rannsókn málsins hófst aftur árið 2011 eftir að hópur nýnasista myrti tíu manns með skömmu millibili. 

• 1 blogg um fréttina

Bloggað um fréttina

• Ómar Ragnarsson: "Enginn kórdrengur" þar og hér?