Alríkisdómari í Seattle í Bandaríkjunum hefur bannað tímabundið útgáfu hugbúnaðar sem gerir fólki kleift að prenta út skotvopn.
Defence Distributed, hópur sem berst fyrir almennri byssueign, ætlaði að birta þrívíddarteikningar af byssu á netinu í dag. Hópurinn hafði komist að samkomulagi við bandarísk stjórnvöld í júní sem gerði honum mögulegt að birta leiðbeiningarnar opinberlega.
Átta ríki höfðuðu mál gegn ríkisstjórn Donalds Trump á mánudag til að koma í veg fyrir að samkomulagið næði fram að ganga á þeim grundvelli að hætta stafaði af óskráðum byssum.
Teikningarnar átti að birta í dag en dómarinn setti tímabundið lögbann á birtinguna í gærkvöldi og benti á að þrívíddarprentarar væru m.a. í menntaskólum og víðar.
Málið verður aftur tekið fyrir 10. ágúst.
Í frétt BBC um málið segir að yfir þúsund manns hafi þegar hlaðið niður teikningum af AR-15-rifflum en slík vopn hafa m.a. verið notuð í mörgum skotárásum í bandarískum skólum.