Flugvél úr seinni heimsstyrjöld brotlenti í ölpunum

20 manns létust í flugslysi í svissnesku ölpunum í gær. Flugvélin, sem er frá árinu 1939 og var meðal annars notuð í seinni heimsstyrjöldinni, hrapaði í fjalls­hlíð í Piz Segn­as í um 2.500 metra hæð. Tvö mannskæð slys hafa orðið í Sviss um helgina.

Frétt mbl.is 

11 karlar og 9 konur voru um borð í vélinni. Flugvélin flaug frá Ticino í suðurhluta Sviss og var ferðinni heitið til herflugvallarins Duebendorf í Zurich. 

„Vélin tók 180 gráðu stefnu í suður og kolféll til jarðar,“ hefur dagblaðið 20 Minutes eftir sjónarvotti. Brak vélarinnar þeyttist í allar áttir sem gefur til kynna að sprenging hafi orðið í vélinni.

Vélin án flugrita

Rannsókn er hafin á tildrögum slyssins. Sökum aldurs vélarinnar er enginn flugriti um borð og því þurfa rannsakendur að reiða sig á vitnisburð sjónarvotta og brak vélarinnar við rannsóknina.

Flugvélin er í eigu JU-Air, fyrirtækis sem tengist svissneska flughernum. Framkvæmdastjóri JU-Air, Kurt Waldmeier, segir að vélin hafi farið í gegnum reglubundið eftirlit í júlí. Fyrirtækið rekur lítinn flota af Junker-flugvélum sem eru allar frá árinu 1939. Vélarnar eru til útleigu og eru allir flugmenn á vegum fyrirtækisins fyrrverandi hermenn og atvinnuflugmenn.

Talið er að allir 20 farþegar vélarinnar hafi látist. AFP

• 1 blogg um fréttina

Bloggað um fréttina

• Ómar Ragnarsson: "Þristur" Þjóðverja.