Rússneskar herþotur vörpuðu sprengjum á Idlib-hérað í Sýrlandi í morgun eftir þriggja vikna hlé.
Rami Abdel Rahman, yfirmaður sýrlensku mannréttindavaktarinnar (Syrian Observatory for Human Rights), greindi frá þessu.
Sprengjum var varpað á þó nokkur svæði undir stjórn hryðjuverkasamtakanna Hayat Tahrir al-Sham, meðal annars í bænum Jisr al-Shughur.
Einnig féllu sprengjur í bænum Ariha þar sem uppreisnarmenn sem njóta stuðnings Tyrkja dvelja.
Donald Trump Bandaríkjaforseti varaði stjórnvöld í Sýrlandi í gær við því að gera árás á síðasta vígi uppreisnarmanna í Idlib-héraði, með aðstoð Rússa og Írana.
Hann sagði að slík árás geti hrundið af stað „mannlegum harmleik“.
Engar fregnir hafa borist af mannfalli í héraðinu eftir að árásirnar hófust í morgun.