Bandaríkin, Frakkland, Þýskaland og Kanada hafa gefið út sameiginlega yfirlýsingu þess efnis að þau styðji bresk yfirvöld í ásökunum þeirra um að stjórnvöld í Rússlandi hafi samþykkt taugagasárásina á rússneska njósnarann Sergei Skrípal og dóttur hans Júlíu. Jafnframt hafa þau hvatt Rússa til að ljóstra upp um Novichok-áætlun sína.
Yfirlýsingin var gefin út í kjölfar fundar öryggisráðs Sameinuðu þjóðanna þar sem Novichok-árásin var til umræðu, en Rússar lýsa enn yfir sakleysi sínu í málinu þrátt fyrir að tveir rússneskir menn, sem taldir eru starfa fyrir leyniþjónustu rússneska hersins, hafi stöðu grunaðra í málinu.
Samkvæmt upplýsingum frá lögreglu lentu mennirnir tveir, Alexander Petrov og Ruslan Boshirov, á Gatwick-flugvelli 2. mars og gistu í austurhluta London áður en þeir tóku lest til Salisbury 4. mars, þar sem útihurð Skripal var menguð með Novichok-taugaeitri.
Theresa May, forsætisráðherra Bretlands, ávarpaði breska þingið í gær og sagði það liggja ljóst fyrir að stjórnvöld í Moskvu hefðu veitt leyfi fyrir árásinni.