Erlent | mbl | 14.1.2019 | 21:09 | Uppfært 15.1.2019 5:16

„Það er mikil sorg í Póllandi í dag“

Þúsundir söfnuðust saman í Varsjá í kvöld til þess að minnast Adamowicz og mótmæla hatri. AFP

Pawels Adamowicz, borgarstjóra í Gdansk í Póllandi, er víða minnst í dag, en heilbrigðisráðherra landsins staðfesti að hann hefði látist af sárum sínum, sem hlutust er tilræðismaður stakk hann í hjartað á fjöldafundi í gærdag. Ingibjörg Sólrún Gísladóttir og Andri Snær Magnason eru á meðal Íslendinga sem minnast hans í dag.

Ingibjörg Sólrún er búsett í Varsjá höfuðborg Póllands, þar sem hún starfar sem framkvæmdastjóri lýðræðis- og mannréttindastofnunar ÖSE. Á Twitter-reikningi sínum segir hún að hún sé afar leið yfir því að heyra af andláti Adamowicz.

„Hann talaði fyrir réttindum þeirra sem áfram þurfa á vernd okkar og stuðningi að halda,“ sagði Ingibjörg Sólrún um borgarstjórann og á Facebook-síðu segir hún að það sé mikil sorg í Póllandi í dag vegna morðsins.

Frétt af mbl.is

Borgarstjóri Gdansk látinn

Það er ekki ofsögum sagt hjá Ingibjörgu Sólrúnu. AFP-fréttaveitan greinir frá því að þúsundir Pólverja hafi komið saman í fjölmörgum borgum og bæjum landsins og minnst borgarstjórans.

Flestir komu saman í Gdansk og Varsjá og minntust borgarstjórans, þeirra á meðal Donald Tusk, forseti leiðtogaráðs Evrópusambandsins, sem var vinur og pólitískur bandamaður borgarstjórans.

Frá fjöldafundi í Varsjá undir kvöld. AFP

„Mildur og geðþekkur maður“

Andri Snær Magnason rithöfundur segir á Facebook-síðu sinni að það hafi verið skelfing að heyra af morðinu á Pawel og lýsir honum sem undrabarni í stjórnmálum, en Adamowicz varð borgarstjóri í Gdansk einungis 33 ára gamall og hafði gegnt embætti sínu í 20 ár.

„Pawel var frjálslyndur stjórnmálamaður, stuðningsmaður innflytjenda og samkynhneigðra á tímum rísandi popúlisma og þjóðernishyggju í Póllandi. Hann var sérstakur verndari og þáttakandi í Gay Pride göngunni í Gdansk síðasta sumar og eindreginn andstæðingur þjóðernisöfga núverandi ríkisstjórnar,“ skrifar Andri Snær, sem hitti borgarstjórann þegar leikritið Blái hnötturinn var sett á svið í Gdansk.

„Ég hugsaði þegar ég hitti hann, hversu merkilegt það er að vera uppi á tímum þegar svo mildur og geðþekkur maður stýrir þessari sögulegu borg,“ skrifar Andri Snær og birtir mynd af borgarstjóranum, sem tekin hefur verið við þetta tækifæri.