Extinction Rebellion á lista yfir öfgahópa
Guðrún Hálfdánardóttir
Setja bókamerki
Hryðjuverkadeild bresku lögreglunnar hefur sett samtökin Extinction Rebellion á lista yfir samtök með öfgafulla hugmyndafræði sem tilkynna á til yfirvalda. Lagt er til að upplýsingar um samtökin fari í gegnum Prevent-prógrammið sem miðar að því að ná þeim sem eru líklegir til að fremja grimmdarverk, að því er segir í frétt Guardian.
Extinction Rebellion, sem eru umhverfissamtök, eru nú komin á lista með nýnasistum og íslamistum, sem ógnað geta þjóðaröryggi í Bretlandi. Listinn er ætlaður fyrir lögreglu, samtök á vegum stjórnvalda og kennara, en þessum stéttum er ætlað að tilkynna til lögreglu grunsemdir um öfgavæðingu. Listinn er frá því í nóvember en honum er ætlað að varna því að börn og ungmenni öfgavæðist.
„Hvernig voga þeir sér?“ sögðu samtökin Extinction Rebellion þegar þau fréttu af nafni sínu á listanum og að sögn lögreglu hefur listinn verið dreginn til baka og hann er nú í endurskoðun, að því er fram kemur í frétt BBC.
Á listanum eru nokkrir hópar. Þar á meðal nýnasistahópurinn National Action og öfgaíslamistahópurinn Al Muhajiroun, en báðir hóparnir eru bannaðir í Bretlandi. Eins eru öfgasamtökin Generation Identity, öfgahópurinn Satanism og öfgahópar í dýravernd á listanum.
Á blaðsíðunni sem fjallar um Extinction Rebellion segir að um baráttuhóp sé að ræða sem hvetur fólk til þess að mótmæla og til borgaralegrar óhlýðni til að þrýsta á ríkisstjórnir til að grípa til aðgerða vegna loftslagsbreytinga og tegunda í útrýmingarhættu.
Fjallað var um samtökin á mbl.is í nóvember er Sigmundur Davíð Gunnlaugsson, formaður Miðflokksins, spurði Guðmund Inga Guðbrandsson umhverfisráðherra um meintan stuðning hans við „öfgakenndu“ umhverfisverndarsamtökin Extinction Rebellion.
Sigmundur spurði hvort Guðmundur styddi aðgerðir samtakanna um að nettólosun gróðurhúsalofttegunda skuli hætt árið 2025.
Shakespeare fannst í skókassa
„Á réttri leið en nokkuð í land ennþá“
Eyjafjarðarbraut lokað vegna alvarlegs umferðarslyss
Vélsleðaslys: Þyrlan kölluð út á mesta forgangi
Gígbarmurinn hækkað frá því í gær
Tveir í bílnum sem lenti utan vegar
Veiting hvalveiðileyfis ekki brot á EES-samningi