Erlent | mbl | 28.3.2020 | 8:43 | Uppfært 10:19

Verri árangur í New York en í Wuhan og á Ítalíu

Fólk á ferli í New York, en þar er uppi samkomubann og þarf fólk að passa upp á fjarlægð sín á milli, líkt og á Íslandi. Smit í Bandaríkjunum eru nú fleiri en í nokkru öðru landi. AFP

Haldi vöxtur kórónuveirusmita áfram í New York-borg í Bandaríkjunum verða áhrif faraldursins þar mun verri en í kínversku borginni Wuhan eða í Langbarðalandi á Ítalíu. Aðgerðir í borginni til að koma í veg fyrir samgang milli fólks gætu breytt talsverðu, en hingað til hefur gengið verr en í Wuhan og Langbarðalandi að „fletja út kúrfuna“ á þessum punkti í faraldrinum. Þetta kemur fram í greiningu New York Times á ástandinu þar í borg. Segir þar jafnframt að fleiri bandarískar stórborgir séu á svipaðri leið og New York, meðal annars Detroit.

Samkvæmt tölum frá Bandaríkjunum komu upp samtals 15 þúsund ný smit í landinu í gær. Eru það aðeins færri smit en á fimmtudaginn þegar 16 þúsund smit komu upp. Heildarfjöldi smita er nú kominn yfir 100 þúsund og eru Bandaríkin fyrsta landið þar sem það gerist.

Frétt af mbl.is

Mennskan kemur fram á erfiðum tímum

Samtals 44 þúsund smit hafa komið upp í New York. Þar af eru 6 þúsund á sjúkrahúsi og 1.600 á gjörgæslu. 519 hafa látist af völdum veirunnar þar. AFP

Í New York er ástandið hvað verst, en þar hafa samtals 44 þúsund staðfest smit komið upp og eru sex þúsund manns á spítala, þar af 1.600 á gjörgæslu. Þá hafa 519 látist í New York vegna veirunnar.

Frétt af mbl.is

„Erfitt að sjá einhvern á fertugsaldri deyja“

Samkvæmt New York Times eru tilfellin í New York á hverja 1.000 íbúa nú flest þar í landi með 2,15 smitaða íbúa á hverja þúsund, en til samanburðar var fjöldinn 4,59 í Wuhan og 3,48 í Langbarðalandi. Tekið skal fram að tölur blaðsins miðast við fjölda smita á fimmtudaginn og hefur þeim síðan fjölgað. Fjöldi þeirra sem hafa dáið vegna veirunnar í New York er 0,03 á hverja þúsund íbúa. Nokkrar borgir eru með hærra hlutfall, en þær eru þó allar mun fámennari en New York, meðal annars New Orleans með 1,3 milljónir íbúa og 0,05 látna á hverja þúsund.

Umferð um götur New York borgar er nú lítil sem engin og hefur mörgum breiðstrætum verið lokað. AFP

Á einu grafi sem New York Times birtir má sjá hvernig hlutfallsfjölgun smita í New York er samanborið við önnur þéttbýlissvæði í Bandaríkjunum, sem og Wuhan og Langbarðaland. Miðað við þá mynd segir blaðið að myndin sé ekki ýkja björt í New York og hlutfall nýrra smita mun hærra í borginni en annars staðar. Reyndar er staðan langverst að þessu leyti í New York þótt miðað sé við Langbarðaland og Wuhan. Bendir blaðið á að í Detroit og New Orleans hafi smitum fjölgað gríðarlega án þess að gripið hafi verið til nægra ráðstafana, en í Seattle og San Francisco hafi á móti tekist að bregðast betur við og „fletja út kúrfuna“.

Grein New York Times.