Bílvelta í hálku í Langadal

mbl.is/Júlíus

Bíll valt í Langadalnum nú um sexleytið í kvöld. Lögreglan á Blönduósi var kölluð til, en í bílnum var ökumaður og tvö börn. Ekki urðu alvarleg slys á fólki en ökumaðurinn og annað barnið kvörtuðu yfir eymslum í hálsi.

Tildrög slyssins voru þau að ökumaðurinn missti stjórn á bílnum í hálku, en hún er nú mjög mikil á þessum slóðum og full þörf á að fara sér hægt. Fólkið var flutt til Akureyrar til frekari aðhlynningar á sjúkrahúsinu þar.

Þá kom lögreglan á Blönduósi að öðrum útafakstri rétt við Blönduós. Þar höfðu engin slys orðið á fólki en ástæðan var sú sama, fljúgandi hálka hafði sent bílinn út af.