Glæsibygging rís í Kópavogi

Krakkarnir á leikskólanum Rjúpnahæð í Kópavogi hafa ástæðu til að syngja piparkökusönginn þessa dagana því undanfarið hafa þau unnið að gerð glæsilegs piparkökuhúss, sem verður meðal framlaga í piparkökuhúsasamkeppninni í Smáralind nú á aðventunni.

Húsið hönnuðu, smíðuðu og skreyttu elstu börnin í skólanum, alls 42 krakkar sem eflaust hafa lært heilmikið á hönnunar- og byggingarferlinu. Haldnir voru 20 mínútna langir vinnufundir þar sem arkitektarnir skeggræddu vinnuferlið og hönnunina. Gerðar voru teikningar, þrívíddarlíkön, mót og skissur áður en ráðist var í baksturinn sjálfan og skreytingarnar, sem sköpurunum þótti vissulega einna mest spennandi.