Hinrik handlagni á listanum

Henry í leiknum á Stade de France. Reuters

Thierre Henry, leikmaður Barcelona, er í byrjunarliði CNN yfir mestu skúrka knattspyrnunnar síðasta áratuginn. Henry, sem gárungarnir kalla Hinrik handlagna, kemst á listann eftir tvígripið á móti Írum í síðari útsláttarleik fyrir HM í Suður-Afríku í júní. Henry er annar í valinu.

En Henry handlék þá knöttinn tvívegis áður en hann renndi boltanum á Gallas sem skildi Írana eftir með sárt ennið eftir hetjulega baráttu á Stade de France.

Vart kemur á óvart að landi Henrys, snillingurinn Zinedine Zidane, sé efstur á listanum.

Rivaldo er í þriðja sæti, Luis Figo í því fjórða, Roy Keane í því fimmta, Adrian Mutu í því sjötta, dómarinn Robert Hoyzer í því sjöunda fyrir að hafa áhrif á úrslit leikja, Joey Barton í því áttunda, Kínverjinn Zheng Zi í því níunda og Diego Maradona og Rene Higuita í því tíunda og ellefta.

Lista CNN má nálgast hér.