Sveinbjörn í tveggja leikja bann

Sveinbjörn Pétursson, markvörður HK, missir af tveimur næstu leikjum liðsins í N1-deildinni í handknattleik. Ómar Óskarsson

Sveinbjörn Pétursson, markvörður HK í handknattleik, hefur verið úrskurðaður í tveggja leikja keppnisbann af Aganefnd HSÍ „vegna grófrar óíþróttamannslegrar framkomu í leik Stjörnunnar og HK í meistaraflokki karla 07.03.2010. Niðurstaða aganefndar er að leikmaðurinn er úrskurðaður í tveggja leikja bann,“ segir í úrskurði nefndarinnar. 

Sveinbjörn missti stjórn á sér í kappleik HK og Stjörnunnar í N1-deild karla á síðasta sunnudag eftir að hafa fengið boltann í andlitið úr vítakasti Vilhjálms Halldórssonar, leikmanns Stjörnunnar. Sveinbjörn réðist á Vilhjálm í framhaldinu þannig að kom til stimpinga. Var þeim báðum vísað af leikvelli af dómurum leiksins með rautt spjald. Vilhjálmur var úrskurðaður í eins leiks keppnisbann af aganefndinni fyrir óíþróttamannslegrar framkomu.

Sveinbjörn iðraðist framkomu sinnar í leiknum og bað alla leikmenn afsökunar eftir að flautað var til leiksloka.

Magnús Stefánsson leikmaður Fram slapp við leikbann en  hlaut útilokun fyrir brot í leik Fram og FH í N1-deildinni á síðasta fimmtudag. Niðurstaða aganefndar er að leikmaðurinn fær ekki frekari refsingu þar sem um fyrstu útilokun á tímabilinu er að ræða.

Sveinbjörn leikur ekki með HK gegn Gróttu í N1-deild karla á morgun og heldur ekki þegar HK fær Fram í heimsókn á fimmtudaginn í næstu viku. Vilhjálmur verður fjarri góðu gamni þegar Stjarnan sækir Akureyri heim á föstudaginn.