Sögðu 85 upp hjá Portsmouth

Leikmenn Portsmouth halda sínu að mestu leyti. Reuters

Um helmingi starfsliðs enska knattspyrnufélagsins Portsmouth, 85 manns, var sagt upp í gær og einhverjir leikmanna liðsins hafa tekið á sig launalækkun.

Félagið er í greiðslustöðvun og unnið er að endurskipulagningu þess. Greiðslustöðvunarstjórinn Andrew Andronikou sagði vð BBC að engum leikmönnum hefði verið sagt upp því þeir væru helsta verðmæti félagsins í leitinni að nýjum eigendum.

Andronikou sagði að nokkrir leikmenn hefðu boðist til þess að taka á sig launalækkun og framkvæmdastjórinn, Peter Storrie, hefði lækkað í launum um 40 prósent. Að öðru leyti væri ekki hægt að eiga við laun leikmanna sem væru verndaðir af Samtökum atvinnuknattspyrnumanna.