Unnur Tara á leið til Ungverjalands?

Unnur Tara Jónsdóttir í leik gegn Grindavík. Árni Sæberg

Svo gæti farið að Unnur Tara Jónsdóttir tæki ekki þátt í titilvörn Íslandsmeistara KR í körfuknattleik kvenna á næstu leiktíð. Unnur gekk til liðs við KR á síðustu leiktíð og var kjörin besti leikmaður úrslitakeppninnar.

Morgunblaðið bar þetta undir Hrafn Kristjánsson þjálfara KR en hann tók við liðinu í sumar af Benedikt Kristjánssyni. „Unnur hefur reynt að komast inn í læknisfræðina hérlendis en það gekk ekki. Hún sendi einnig inn umsókn til Ungverjalands í hálfkæringi og það gekk eftir. Það er bara ánægjulegt fyrir hana og ég býst fastlega við því að hún láti á það reyna,“ sagði Hrafn við Morgunblaðið í gær.