Fyrsta landsliðsmarkið hjá norska fyrirliðanum

Brede Hangeland skorar hér markið gegn Íslendingum í gær á Laugardalsvelli. mbl.is/Eggert

Brede Hangeland fyrirliði norska landsliðsins í fótbolta skoraði jöfnunarmarkið gegn Íslendingum í gær með skalla af stuttu færi eftir hornspyrnu frá John Arne Riise. Athygli vekur að hinn 1.94 m. hái varnarmaður skoraði sitt fyrsta A-landsliðsmark í gær í sínum 62. leik.

Nils Johan Sem fyrrum þjálfari norska landsliðsins og yfirmaður knattspyrnumála hjá norska knattspyrnusambandinu sagði við mbl.is í gær að Hangeland væri vissulega góður að skalla boltann – en aðallega í vörn. „Hann hefur ekki skorað mikið af mörkum í gegnum tíðina en hann er góður skallamaður. Ég veit ekki hvernig stendur á því að hann hefur ekki skorað fleiri mörk eftir horn – og aukaspyrnur í leikjum með okkur.

Hangeland, sem er 29 ára gamall, hefur ekki verið þekktur fyrir að skora mörk með Fulham í ensku úrvalsdeildinni en hann hefur skorað 3 mörk í 87 leikjum og sem leikmaður FCK í Kaupmannahöfn skoraði hann 3 mörk í 63 leikjum. Hann skoraði 6 mörk í 114 leikjum sem leikmaður Viking í Stavanger á árunum 2000-2005.  

Ítarleg umfjöllun um landsleik Íslands og Noregs er í fjögurra síðna íþróttablaði Morgunblaðsins í dag.