Jiménez sigraði í Sviss

Spænski kylfingurinn Miquel Angel Jiménez sigraði á Omega meistaramótinu í golfi sem fram fór í Crans-sur-Sierre í Sviss. Reuters

Spænski kylfingurinn Miquel Angel Jiménez sigraði á Omega meistaramótinu í golfi sem fram fór í Crans-sur-Sierre í Sviss. Mótið er hluti af Evrópumótaröðinni og lék Jiménez hringina fjóra á 21 höggi undir pari eða 263 höggum.

Hann lék lokahringinn á 4 höggum undir pari líkt og Edoardo Molinari frá Ítalíu sem endaði í öðru sæti á 18 höggum undir pari. Landi hans Matteo Manassero varð þriðji á 16 höggum undir pari.

Þetta er 18 sigur Jiménez á Evrópumótaröðinn og er hann í 11. sæti yfir sigursælustu kylfinga mótaraðarinnar. Á þessu ári hefur Jiménez sigrað þrívegis á Evrópumótaröðinni, í febrúar í Dubai og í Frakklandi í júlí.  Hann hefur verið atvinnumaður frá árinu 1982 en Jiménez er 46 ára gamall.