Bebé í Meistaradeildarhópi United

Portúgalinn Bebé. www.manutd.com

Hinn portúgalski Bebé sem Manchester United keypti frá Vitoria Guimaraes í sumar fyrir 7 milljónir punda er eftir allt saman í leikmannahópi United sem félagið hefur tilkynnt fyrir riðlakeppnina í Meistaradeildinni.

Í gær bárust fregnir af því að Bebé og Owen Hargreaves hefðu ekki verið í 24 manna hópnum sem United sendi UEFA en talsmenn UEFA greindu frá því dag að Portúgalinn væri í þeim 25 manna leikmannahópi sem Manchester United tilkynnti fyrir riðlakepnina sem hefst um miðjan þennan mánuð.

Hargreaves er hins vegar ekki í hópnum  en hann hefur verið nánast frá keppni í tvö ár vegna þrálátra meiðsla og fjarvera hans kemur ekki sérlega á óvart. Þó var hann á batavegi í vor, spilaði þá einn deildaleik sem varamaður og kom við sögu í nokkrum varaliðsleikjum.

Hópurinn sem nú er tilkynntur verður óbreyttur í riðlakeppninni sem lýkur 7. desember. Eftir það er hægt að gera á honum breytingar áður en 16-liða úrslitin hefjast seinni hluta vetrar.