Taka ákvörðun um landsfund
Frá fundi Samfylkingarinnar í dag. mbl.is/Eggert
Tillaga þar sem lagt er til að framkvæmdastjórn Samfylkingarinnar hefji undirbúning að landsfundi flokksins sem verði haldinn á vormánuðum 2012, verður tekin fyrir á flokkstjórnarfundi Samfylkingarinnar síðdegis.
Er því beint til framkvæmdastjórnar flokksins að undirbúningur fyrir málefnastarf fyrir landsfund hefjist strax á nýju ári.
Í greinargerð sem fylgir tillögunni segir að Össur Skarphéðinsson utanríkisráðherra hafi nýverið lýst því yfir í viðtali í Viðskiptablaðinu að þörf væri á að endurnýja forystu flokksins fyrir næstu kosningar. Bent er á að enginn hafi stigið fram og lýst yfir andstöðu við þessa skoðun.
„Flytjendur þessarar tillögu lýsa stuðningi við þessi sjónarmið og leggja á það áherslu að landsfundurinn fari fram eigi síðar en á vordögum nýs árs. Á fundinum yrði lagður grunnur að stefnumálum Samfylkingarinnar í kosningum 2013.
Við höfum áhyggjur af því að lykiláherslur Samfylkingarinnar um efnahagslegan stöðugleika og uppbyggingu í atvinnumálum séu í uppnámi. Með því að afhenda samstarfsflokknum í ríkisstjórn forræði á þessum málaflokkum er verið að snúa baki við áherslum, stefnumótun og áætlunum Samfylkingarinnar í mikilvægum málum og stefna markmiðum okkar í hættu.
Á umbrotatímum í lífi þjóðarinnar er nauðsynlegt að flokkurinn sé virkur og komi oft saman. Fullt tilefni er til að trúnaðarmenn flokksins taki höndum saman á landsfundi á vordögum og leggi línurnar fyrir þá mikilvægu kosningabaráttu sem framundan er fyrir Samfylkinguna. Við, sem leggjum fram þessa tillögu, erum ósátt við þær breytingar sem orðið hafa á áherslum flokksins í ríkisstjórnarsamstarfinu og við þau vinnubrögð sem viðhöfð hafa verið og kristallast í skorti á samráði og samvinnu,“ segir í tillögunni.
Þeir sem flytja tillöguna eru þau:
Andrés Jónsson
Anna Sigríður Guðnadóttir
Björgvin Valur Guðmundsson
Gunnar Alexander Ólafsson
Íris Björg Kristjánsdóttir
Sigríður Dögg Auðunsdóttir
Soffía Sigurðardóttir
Þorsteinn Ingimarsson
Ýr Gunnlaugsdóttir
