Sex mörk Kára dugðu ekki til - Dagur fagnaði

Kári Kristján Kristjánsson og Sverre Jakobsson voru báðir í eldlínunni með sínum liðum í kvöld. Kári skoraði sex mörk. Golli / Kjartan Þorbjörnsson

Allir þrír leikir kvöldsins í þýsku 1. deildinni í handknattleik voru Íslendingaslagir. Kári Kristján Kristjánsson og félagar í Wetzlar tóku á móti Füchse Berlín þar sem sem Dagur Sigurðsson er þjálfari og Alexander Petersson leikmaður en hann er meiddur og var því ekki með. Kári lék mjög vel í sóknarleik heimamanna og skoraði sex mörk sem dugðu þó ekki til sigurs því Dagur Sigurðsson gat fagnað þriggja marka sigri 29:26.

Staðan í hálfleik var 15:18 en eins og tölurnar bera með sér var lítið skorað í síðari hálfleik. Til að mynda var aðeins eitt mark skorað síðustu þrjár og hálfu mínútuna en Wetzlar tók leikhlé þegar tvær mínútur voru eftir og staðan 28:26. Það breytti engu því enn náðu leikmenn liðsins ekki að koma boltanum í netið.

Grosswallstadt með Sverre Jakobsson innanborðs tók á móti Rúnari Kárasyni og félögum í Bergischer. Heimamenn höfðu betur 24:23 en Sverre, varnartröll, var ekki á meðal markaskorara. Rúnar skoraði hinsvegar eitt mark fyrir gestina.

Fyrr í kvöld áttust svo við Íslendingaliðin Kiel og Löwen þar sem Kiel hafði betur. Nánar má lesa um það með því að smella hér.