Slyddu spáð í kvöld

Það var alhvít jörð í Reykjavík í morgun mbl.is/Hjörtur

Það gengur í suðaustanátt með úrkomu víða á sunnan og vestanverðu landinu í kvöld, fyrst slyddu og síðan rigningu en snjókomu á fjallvegum. Skyggni getur orðið takmarkað um tíma í nótt og fyrramálið og einnig má gera ráð fyrir hálku á landinu, einkum þar sem er slydda, samkvæmt upplýsingum frá veðurfræðingi Vegagerðarinnar.

Hálka er á Hellisheiði og í Þrengslum. Hálkublettir eru á Sandskeiði og á flestum leiðum á  Suðurlandi. Þó er snjór á Mosfellsheiði og við Þingvallavatn.

Á Vesturlandi er snjór og éljagangur á Bröttubrekku og Holtavörðuheiði. Hálka er annars á flestum leiðum

Víðast hvar á Vestfjörðum er hálka eða hálkublettir.

Hálka eða hálkublettir eru um norðanvert landið. Snjór er þó á Öxnadalsheiði, við Mývatn og á Mývatnsöræfum.

Á Austurlandi er hálka  á öllum aðalleiðum en þó sumstaðar snjóþekja. Hálka er svo með ströndinni að Höfn en hálkublettir þaðan í Kvísker.

Þungatakmarkanir

Þungatakmarkanir eru nokkuð víða um land.