Hreyfilhitari er búnaður sem tengdur er við rafmagn með venjulegri innstungu og forhitar hreyfil bifreiðar áður en hún er gangsett sem hefur í för með sér aukinn eldneytissparnað og minni losun mengunarefna frá bifreiðinni.

Hjá Landsvirkjun stendur til að setja hreyfilhitara í átta fyrirtækisbifreiðar auk sex einkabifreiða starfamanna.

Markmiðið með tilraunaverkefninu er að draga úr loftmengun og auka notkun innlendrar endurnýjanlegrar orku og telja talsmenn Landsvirkjunar að hreyfilhitaravæðing bifreiða fyrirtækisins gæti sameinað báða þessa kosti.

Að sögn Jóns Baldurs Þorbjörnssonar bíltækniráðgjafa og ráðgjafa Landsvirkjunar virkar búnaðurinn í stórum dráttum þannig að hreyfilhitarinn er settur inn í kælivatnsrás vélarinnar og hitar vatnið upp eins og hraðsuðuketill.

"Þetta gerir það að verkum að vélin er volg og því auðveld í gangsetningu auk þess sem hún eyðir mun minna," sagði Jón Baldur í gærmorgun þegar hann rýndi með fréttamönnum ofan í vél bifreiðar Ebbu H. Gunnarsdóttur ritara hjá Landsvirkjun, en Ebba er fyrsti stafsmaður fyrirtækisins sem tekur hreyfilhitarann í notkun.

Inni í bifreið Ebbu er tímastilltur stýribúnaður sem gangsetur búnaðinn sjálfkrafa með tilliti til útihitastigs svo vélin verði orðin heit þegar að er komið á frostköldum vetrarmorgni.

Rúsínan í pylsuendanum er síðan sérstakur hitablásari sem staðsettur er inni í bifreiðinni sjálfri. Hann fer í gang á sama tíma og búnaðurinn fram í vél, bræðir hrím innan af rúðum og hitar upp fólksrýmið eins og um miðstöð væri að ræða.

Búnaðurinn fæst hérlendis í verslunum og kostar fáeina tugi þúsunda.