Undanfarin ár hefur borið nokkuð á því að nemendur haldi í miðbæinn eða í Kringluna til að hittast og hanga eftir að samræmdu prófunum lýkur og oft hefur neysla áfengis fylgt með í kjölfarið. Til þess að bregðast við þessum vanda er nú krökkum í allmörgum skólum boðið í svokallaðar óvissuferðir strax að loknum prófum, og hefur það færst nokkuð í vöxt undanfarin ár.

Loftur Magnússon, skólastjóri Setbergsskóla í Hafnarfirði, segir að foreldrafélag skólans standi fyrir óvissuferð og að farið verði af stað eftir hádegi í dag. "Og ég veit ekki annað en að það sé mikill spenningur hjá krökkunum að fara með.

Málin voru komin útí algjöra vitleysu

Ég var einmitt á fundi með skólastjórum þriggja annarra skóla og það verður farið í ferðalög í þeim öllum. Einn skóli er reyndar með vorferðina á þessum tíma, en það eru foreldrafélögin í hinum skólunum sem standa fyrir dagsferðum. Þetta er nauðsynlegt, enda voru þessi mál komin út í algera vitleysu."

Haraldur Finnsson, skólastjóri Réttarholtsskóla, segist mjög oft hafa lagt til við foreldra sinna nemenda að próflokin væru sérlega gott tilefni til að bjóða börnunum út að borða. Skólinn býður síðan nemendunum í ferðalag daginn eftir síðasta próf, sem er vorferðalag á vegum skólans. Foreldrafélag skólans hefur staðið fyrir foreldrarölti í vetur og hefur verið með auka viðbúnað um kvöldið að loknum prófum.

Foreldrar haldi upp á tímamótin með börnunum

"En ég mæli mest með því að foreldrarnir haldi upp á þessi vatnaskil með börnunum sínum, mér finnst að krakkarnir eigi það skilið."

Af hálfu lögreglunnar í Reykjavík verður viðbúnaður vegna próflokanna, ekki eingöngu síðasta prófdaginn heldur einnig um næstu helgi. Að sögn lögreglunnar verður unglingadrykkja ekki liðin í umdæminu og öllu áfengi hellt niður sem finnst á unglingum. Verði unglingar uppvísir að drykkju á almannafæri verða forráðamenn þeirra látnir vita og þeir beðnir um að sækja börn sín á lögreglustöð.