Útvarp Saga 94,3 hóf útsendingu á nýrri dagskrá, sem er eingöngu byggð á fréttum, spjalli og sporti, klukkan níu í morgun. Jón Axel Ólafsson, framkvæmdastjóri útvarpssviðs Norðurljósa, flutti ávarp og hóf útsendingu stöðvarinnar formlega.

Í ávarpi sínu sagði Jón Axel meðal annars að aðstöðumunur ljósvakamiðla á Íslandi hefði verið áberandi allt frá því fyrsta frjálsa útvarpsstöðin tók til starfa fyrir 15 árum og þá helst í tengslum við lögþvinguð afnotagjöld Ríkisútvarpsins. Á hverju ári fengi Ríkisútvarpið til reksturs tveggja útvarpsrása á milli sex og sjö hundruð milljónir króna í formi afnotagjalda auk um 300 milljóna í auglýsingatekjur. Samt væri tap Ríkisútvarpsins um 250 milljónir á síðasta ári.

Jón Axel sagði ennfremur að einkafyrirtæki hefðu sýnt og sannað að þau væru nógu hæf og ábyrg til að reka fjölmiðla sem sinna frétta- og upplýsingaskyldu gagnvart almenningi og að nú þegar Útvarp Saga 94,3 hæfi útsendingar með nýju og breyttu sniði væri brotið blað í sögu íslensks útvarps.

Að loknu ávarpi Jóns Axels hófst formleg dagskrá stöðvarinnar og Sigurður G. Tómasson tók um stjórnartaumana. Fyrsti gestur Sigurðar var Ingibjörg Sólrún Gísladóttir, borgarstjóri í Reykjavík.

Ásamt Sigurði G. Tómassyni munu þeir Ingvi Hrafn Jónsson og Hallgrímur Thorsteinson skipa bakvarðasveit stöðvarinnar auk Þórs Bæring, sem er íþróttafréttamaður hennar.