Landbúnaðarráðherra hefur ákveðið að útflutningshlutfall kindakjöts skuli vera 25% á tímabilinu 1. september til 31. október. Er þetta hærra hlutfall en ákveðið var á síðasta ári en lægra en stjórn Bændasamtaka Íslands lagði til. Þá hefur útflutningsgjald af dilkakjöti verið ákveðið 186 kr. á kíló af dilkakjöti.

Frá 1. nóvember til og með 17. nóvember verður útflutningshlutfallið 16%, en 8% frá 18. nóvember til og með 31. desember 2002 og er þetta í samræmi við tillögur Bændasamtakanna.

Stjórn Bændasamtakanna lagði til að útflutningshlutfallið yrði 28% til 31. október en hlutfallið var 21% sl. haust. Ástæða þess að lagt var til að útflutningshlutfallið hækki nú er aukin birgðasöfnun, m.a. vegna samdráttar í sölu kindakjöts innanlands. Samkvæmt bréfi Bændasamtakanna frá 22. ágúst er útflutningsþörfin talin vera 1.694 tonn og lagt er til að 200 tonn verði flutt út til viðbótar til að draga úr birgðum.

Í tilkynningu frá landbúnaðarráðuneytinu segir að á þetta hafi ráðherra ekki fallist og leggi hann frekar áherslu á að brugðist verði við vaxandi birgðasöfnun með söluátaki innanlands. Þá vísi ráðherra til þess að á næstu dögum hefjist viðræður um endurskoðun gildandi sauðfjársamnings þar sem m.a. fyrirkomulag útflutnings hljóti að koma til skoðunar. Eðlilegt sé að fresta svo róttækum breytingum á útflutningshlutfalli þar til niðurstaða úr þeim viðræðum liggi fyrir.